Pa Ni Tuanbia tawi (A Brief History of Fathers Day)

 

Fathers Day a dirhtu Mrs. Sonora Smart Dodd le upatnak a rak pekmi a pa Mr. William Jackson Smart an si.

American Civil War veteran William Jackson Smart fanu Sonora Smart Dodd (Feb.18.1882 Jenny Lind, Sebastian County, Arkansas) nih a rak thawk mi Fathers Day kan hmannak hi kum 100 lengkai kan hung lut cang hna. Mrs. Sonora nih harsatnak phunkip paltlang in ai zuamnak nih nihin ahcun ram tampi hna nih inn chungkhar ah pale hi zeitluk sunglawi dah an si timi an kan hngalhter thanmi hmuh tikah lunglawmh awk ngaingai a si. Asinain scholars cheukhat hna nih an tuak ning ah Fathers Day conglawmhnak hi kum 4,000 leng hrawng khan rak hman cang mi a si tiah an ti. A tanglei ah fiang deuh in vun zoh tuah hna usih.

Pa Ni Rak Hman Hmasanak Tuanbia (Earlest History of Fathers Day)

Scholars cheukhat an zumhning ah Pa Ni aa thawhkehnak hi a hnubik i a hung lang mi (latest phenomenon) thil (atu Fathers Day kan hmanmi) hi a si lo. Fathers Day hi Babylon a rawhral lio hrawng hin Pale upat peknak hmelchunhnak hi a rak um cang timi hi an tlaihtleng deuh cu si. An record ah kum 4000 lio hrawng hin pa hngakchia a min Elmesu tiah auh mi pa nih a pa upat peknak ca ah tlak in sermi catlap (clay card) hmang in ca a rak kuat. Cun Elmesu nih Babylon ram pa vialte cu ngamdamnak le dam saunak ngei dingin saduhthahnak a rak pek hna. Hi hnu Elmesu le a pa kong hi record a um ti lo. Elmesu nih a rak hman mi Fathers Day hi zungkhar ni tiang in rak hman a si lo tik ah a hnu ah cun a lo han tiah an ti.

US ah Pa Ni Tuanbia (History of Fathers Day in US)

Tuchan Fathers Day conglawmh hmasacemnak cu USA in ai thawk i vawlei kildeng tiang a phan. Ram tampi le miphun tampi hna nih Fathers Day hi ulh mi le sunlawih cio mi ni zong ah a hung i chuah. Vawlei mi tampi nih Mrs. Sonora a thil tuah mi cung ah upat hmaizahnak an pek.

Mrs. Sonora nih kum 1909 Nu Ni thawngtha chim a ngaih lio hin Pa Ni conglawmhnak zong hi tuah si ve seh ti hi a lungthin chung ah a um. Kum 27 hrawng a si mi Mrs. Sonora nih nule upat peknak hmanh a um ahcun zeicahdah chungkhar ah lubik a simi pale cu upat peknak ni cu kan serpiak ve hna lai lo tiah a rak ti. Mrs. Sonora kum 16 a si ah a nu (Ellen Victoria Cheek Smart) cu nau cung in mual a liam. Cu tikah a pa nih a fale pa ruk (fapa 5 le Sonora) cu a cawmken hna. A pa sinin a hmuhmi dawtnak ruangah fakpiin a pa upat peknak Fathers Day tuah kha ai zuam.

Mrs. Anna Jarvis nih a thokmi Mothers Day conglawmhnak nih Mrs. Dodd a lungthin chungah fakpiin rian a tuan. Cu tikah Dodd nih US ah Fathers Day conglawmh dingin campaign a rak thok i forhfialnak zong a rak tuah hna. Dodd nih a chuahpimi ruahnak cu the Spokane Ministerial Association and the local Young Mens Christian Association (YMCA) nih hnatlakpinak an rak ngeih i June 19, 1910 kum ah a voi khatnak bik Fathers Day cu an rak tuah.

President Woodrow Wilson nih 1916 kum lioah Spokane khua Fathers Day conglawmhnak ah Pa Ni hi zungkhar ni ah ser a duhnak zong a chim nain Congress phu hna nih chawlehthalnak ah a can sual lai kha an phan ca ah an hnawl. President Calvin Coolidge nih 1924 kum ah Pa Ni cu ram mi hna nih ulh ni si dingin forhfialnak a tuah hna hnu ah ramchung bia chawkvai (congress phu hna nih an soisel) ruangah rak phih han a si.

Maine Senator Margaret Chase Smith nih 1957 kum ah hringtu nulepa pahnihte kan ngeihmi chungin Nu Ni sunlawihnak kan tuah lioah Pale upat peknak ni cu kum 40 chung nan hnawl (a hmulo bantuk tein nan um) tiah a rak soisel hna. Presiden Lyndon B. Johnson nih 1966 kum ah Pa Ni conglawmh upat peknak ni cu June a zarh thum nak ni ah tuah siseh a rak ti. Cuti kum ruk a rauh hnu ah President Richard Nixon nih 1972 kum ah Pa Ni cu zungzal ulh ni si dingin kutzung namnak a rak tuah. Mrs. Sonora Smart Dodd cu the Worlds Fair in Spokane nih 1974 kum ah upat peknak an rak tuah. Mrs.Sonora cu 1978 a kum 96 a si ah hi vawlei harsat tuarnak in zungzal retheih a um ti lonak hmun Pathian sinah ai din.

Post a Comment

0 Comments