FB ka hawile vialte nan sinah youtube ah ramsa video tawite ka zohmi kong hrawmh kan duh hna.Fung (wildebeest) phukhat hna cu tidil pakhat ah ti an ding hna. Nuam ngai le hnangam ngai in an duh/halmi ti an din lioah cun ti chungin tisartlam nganpi nih a vun nam hna.
A dang cu an zam manh nain pakhat bel a hnulei orhlei ke in a seh/tlaih manh. Fung nih cun a luatnak dingah a thazaang dihlak chuah in aa zuam len nain tisartlam nih fek tuk in a seh/tlaih caah a taang ko. Fung nih titlang lei ah a hnuh chel, tisartlam nih tichung lei ah a hnuh chel tiin caan sau nawn khi an i sual. Fung a ba tuk i aa din tawn. Tisartlam nih a vun hnuh caan ah a bat tuk bu tein a vun i hne i titlang leiah a hnuh ve lengmang.
Fung cu a awn pah, a hram pah! A thinphan le lungretheih zeidek a lawh hnga? A hawile nih cun tlangin an zoh sawhsawh ko. An hawi le tisartlam an i sualnak hi tithuhnak a si lo, mining khup tiang hrawng lawng a thuhnak a si. Tampi a hau lo, pathum/pali nih hei zuanhnawh hna sehlaw tisartlam kha an ke in vun lamchih hna sehlaw an hawi hi an chanh khawh tuk ding khi a si ko. Asinain an bawm lo.
Fung caah ruahchannak a um ti lo khi a si. Tisartlam nih fek tukin a tlaih cang, a cawlcanghnak ah a thazaang zong a dih cang. Zeitindah a ti kun lai? Ka hawile zong nih an ka bawm lo, ka thazaang zong a dih cang, hika hi ka thihnak ding cu a si ko tiin tisartlam kut ah aa pe lai maw? Asiloah a tha-ne chuah in aa hne rih lai dah?
Careltu biahal kan duh! Fung dirhmun ahhin um law nang zeitindah biakhiahnak na tuah lai? Lungdong in maw na um sawhsawh lai, asiloah naa hne rih lai dah? Tisartlam nih a vun hnu than i Fung nih cun “zeiti tha mu” a ti nemmam lo! A vun i hne tulmal i titlang lei ah a hnuh ve.
Cu lioah cun pe 30 hrawng a hlatnak ah a ummi ti-vok (hippo) pahnih nih an hmuh hna i an va kal hnawh hna. Tisartlam cu an lamh i Fung ke a sehmi cu a thlah, cuticun Fung cu tilang lei ah a tli i a luat!
Zeidah a kan cawnpiak: Na tuahmi le tuanmi, naa tinhmi, na saduhthah le lungthlitum ah harnak, dawnkhamtu, buainak, kehleng phelhtu, leirawitu tbk a phunphun na tong ko lai. Na dawtmi, na hawikom, na bochanmi ngaimi hna nih an in bawmh duh lo caan, hnu an in chit caan zong a um ko lai! Cu bantuk dirhmun i na dir lioah a cunglei i Fung le tisartlam kong ka chimmi khi philh hrimhrim hlah.
Lungsau tein naa zuam i naa hnek ko a si ahcun na theih bal lomi, a mui hmanh na hmuh bal lomi hna sinin bawmhnak a ra kho ko. Fung kha a hawile nih an zoh sawh lioah ti-vok pahnih nih an chanh kha mu! Tutan i ralhrang dohnak zongah kan i hnek a hau te lai. Fawitein tei khawh a har lai. Kan thazaang dihlak chuah in kan i hnek lo ahcun sungh khawh a si. Kan i hnek khawh a si ahcun kan ram inn-pa hna sin in bawmhnak kan hmuh lo zongah ramhla piin bawmhnak a ra kho ko.By. Salai Bawi
0 Comments