Kan Takpum ah Tidat A Reu nak nih A Chuahpi Mi Thatlonak


Ni Linh Khuaal lakah kan i chawh tikah siseh, rian kan tuan tikah siseh kan takpum a linsat ning kan i ralrin deuh ngai a hau. Ni lin lakah rian kan tuan ah siseh, leng kan chuak tikah siseh kan thlan a chuak i kan takpum ah a um mi tidat pawl fawi tein a reu.

Thaal caan a hlei in kan takpum ah tidat hi a reu khun cu kan theih dih cio mi a si, kan takpum ah tidat a reu tikah vanchiat ah cun nunnak ca tiang hmanh ah thinphan a si. Cu ruangah kan takpum ah tidat a reu nak nih zeibantuk thatlo nak dah a chuahpi timi kan rak langhter.......

Kan Takpum ah Tidat A Reu Ahcun Zeitin Dah kan um 

Kan takpum ah tidat a reu nak cu thlan chuah ruang, thawdawpnak, Zuun zun nak, mithli tlak, cilchak tibantuk ruangah kan takpum chungah a um mi tidat pawl kha a reuter. Cu ruangah caan hman tein ti din piak nak nih kan takpum chungah a reu mi tidat kha phihkhar piak a hau.

Kan takpum nih a herhmi zat tidat kha kan phihkhar piak dingin ti kan din lo a si ahcun zawt khawh zong a si, pawng (ek ek) kal hman lo, luak luak, voidang nak in thlan chuah khun, a tuleklek in zuun tibantuk a chuahpi khawh.

Kan takpum ah tidat a reu cang timi cu zeitin dah kan hngalh khawh lai tiah cun tihaal lengmang, hrawmcar, zuun zun tikah zuun a eng, takpum a rocar, lufah, taksa fah tibantuk pawl ton asi.

Cu pin ah kan takpum ah tidat a reu tuk lawmman asi ahcun zuun zun tikah chuak kho lo tiang in um, siloah zuun zun tikah zuun a eng mi lawngte in zuun zun, takvum pawl a rocar dih, lungmih, lungtur a rang, thawhchuah a rang, mit zong zeitin dek a um, hngilh khawh lo in um, umtu thutdir a nuam lo, takvum a rau in a rau tibantuk tiang kan takpum ah tidat a reu nak nih a chuahpi mi a si.

Zeitindah Kan i Runven Lai

Kan takpum ah tidat a reu lo nak dingah kan ti a haal lawngah ti din lo ding, asi khawh ahcun suimilam pakhat dan in ti hrai khat tete in din piak ding. Ka ti a hal lo ti i tihaal tuk lio lawngah ti din lo ding.

Na buaituk, na rian a tamtuk i tidin ka philh sual lai ti na phan ahcun suimilam cheu dan in alarm chiah piak. Zung rian a tuan mi hna na si ahcun na cabuai cung te ah tidur i chiah peng, leng chuah paoh ah tidur ken philh bak lo ding.

cu hnu ah ti aiawh ah thingthei hang, a hang a tam mi thingthei pawl zong ei piak ding. Tulio nilinh le khuaal caan ah ti tampi in dinpiak philh bak lai ci. Cu lawng ah na takpum ah tidat a reu lai lo i rian zong tha tein na tuan khawh lai.

#ChinCele