Tai Nam Kawng Le Men Ri Hei TUANBIA


Hlan liopi Lai khuate pakhat ah, Tai Nam Kawng timi pa chuak thiam ngai a rak um. A nupi cu samthlairem, muidawh taktak, pumrua ṭha tukmi a si.Men Ri Hei sam cu an ṭha tuk i, a sam aa thlah dih ahcun a lu in a ke in lam 5 dan tiang a phiah in aan phiak ding a si. A takvun a vaar in a vaarmi Men Ri Hei cu an khua ah aa dawh tuk i dawhnak le vel ngeihnak in a min a thang.

Voikhat cu, Tai Nam Kawng nih an inn tikuang khat cikcek in ti a than pinah kuang dang a saihmi chung zongah liam dihlak in a than hna. Cun, a nupi sinah, “Khual ka tlawng lai. Khual ka tlawn karah khua lengah rung chuak hlah!’’ tiah bia a cah.

Tai Nam Kawng cu a khualtlawnnak cun aa ruah ning nakin a hung rau deuh. A nupi Men Ri Hei caah a thanpiakmi ti zong an zor ngai cang.Khuami a hawile nih Men Ri Hei cu inn ah cun ti cu ikholh hlah, kanmah sinah khualeeng ah ikholh ve ko tiah an hnek.Ni khat ah, Men Ri Hei cu khua lengah cun a hawile tikholh ah an kal. Ti an ikholhnak ah cun Men Ri Hei samfang a tlami zong an um.

Men Ri Hei samfang lakah pakhat cu ti nih a fenh i tili nganpi chung a va phan.Tili chung a phanmi Men Ri Hei samfang cu ngapi nih a dolh.Cu ngapi cu tisum lei ah a kal lengmang i Kawl rawn a niamnak tiva nganpi ah a va tlong. Ngapi cu Kawl ngatlaipa nih a sur chehnak in a rak tlaih.Nga ril cu an chuah tikah samfa cu an hmuh i an zelh lengmang tikah dingkawk mu tia a ti.Cucaah an khuaruah a har i cu sam cu an Siangpahrangpa an va hmuhter. An Siangpahrangpa nihcun, “Vawlei cungah hi bantuk tlukin sam a saumi hi ka hmu bal lo. Mah sam ngeitu hi ka kawl lai,’’ tiah a ti.

Kawl Siangpahrangpa le a minung pawl cu vokkuanglawng in tiva hna lei ah a kal. Ni nga an kal hnu ah Men Ri Hei umnak khua cu an phaan.An phak tikah Men Ri Hei nih innka aa hrenh khumh caah innka cu hreitlung le namtong in an ceh an bauh i inn chungah cun an va lut i a nupi i ser awkah an khua ah an tlunpi.Kawl hna i an kalpi hlanah Men Ri Hei nih a zuatmi a chizawhte pakhat sinah hitihin bia a cah tak:

“Tai Nam Kawng a tlun tikah, nangmah kha in that seh law, na zunthil kha tingtang ah run ser sehlaw, aa tum pah in run ka kawl te seh,” tiah a chimh taak i a ṭahbu rang cung ah an chuan i hri in an ṭem i an kalpi thliahmah ko.Tai Nam Kawng cu a rung tlung i, “Maw Men Ri Hei ka thainu, thir inn thuan thum kha rak ka hung,” tiah a ti. Cu tikah chizawh nih, “Men Ri Hei cu Kawl Siangpahrangpa nih hrihrual lam thum in a hruai cang e,” tiah a chimh.

Tai Nam Kawng cu inn chungah a vung lut i, “Na pi nih zei bia tal an Chim ta maw?,” tiah a hal.
Chizawhte nihcun Men Ri Hei bia a cahtak bantuk tein a chimh.

Tai Nam Kawng nihcun chizawhte cu a thah i a zunthil cu tingtang ah a siam hnuah a nupi kawl ah Kawl khua ah a kal.An khua tlang a phak in a tingtang te cu aa tum i Kawl Siangpahrangpa le nupi ah aa tuahmi Men Ri Hei nih an theih tikah Men Ri Hei nihcun, “Mah tingtangte cu kan karlak te ahhin rung tum sehlaw a ṭha hnga lo maw?” tiah a ti.

Kawl Siangpahrangpa inn pawng a phanh tikah Tai Nam Kawng nih a tingtang cu a tum. Men Ri Hei nihcun Kawl Siangpahrangpa cu, “Tingtang tumpa cu au usih!”tiah a ti.Tingtang tumpa cu an hei auh i a ra. Tlawmpal ah Kawl Siangpahrangpa cu inn chung a luh karah khin Men Ri Hei nih Tai Nam Kawng sinah, “Kawl Siangpahrangpa hi khual a kal karah kan tli lai,” tiah biathli a chimh.

Men Ri Hei nih Kawl Siangpahrangpa cu khualtlawn a fial. Kawl Siangpahrangpa nihcun khualtlawn a kal lai ah innka hram ah vainam saupi har taktakmi a thalkadak in a chiah i khuallam cu aa thawh.



Kawl Siangpahrangpa khualtlawn a kal hnu cun Men Ri Hei le a vapa Tai Nam Kawng cu kan tli lai tiah innka cun an chuak i Kawl bawipa i vainam a thal in a chiahtakmi kha an hmu lo i Men Ri Hei nih a lamh sual i a ke a tan dengmang.

Mah lioah cun Tai Nam Kawng cu Siangpahrang sinum pawl nih thah in an dawi. Tai Nam Kawng cu a tli lengmang i an khua a phak cangka a bat tuk caah a thi i a ruak an vui. Men Ri Hei cu a ke hma he cun a vapa cu a dawi lengmang i lampi ah “Na vapa a thi cang,” tiah mi nih an chimh.

Men Ri Hei nih cun a va thlan cu a kawl nain a hmu lo. A hnu ah ngakchia rual a hal hna i chimh awk an hngal fawn lo.

Caw lu le naa lu an tarnak kip a va zoh i a hnu bik ah a va thlaan cu a va hmuh. A hmuh cangka tein a va thlaan cu a hlai zokzok i a ruak a phanh cangka tein a pawngah a vung it i a thin hmaka ah a hrukpi in aa chun i a thi ve.

Tai Nam Kawng le Men Ri Hei cu an ruak lawng an i tong i vawlei ah an ciam ṭi ko.

***
Lai Pupa Tuanbia.
Previous Post
Next Post

post written by: