Ngun Zal Le Thang Zal Tuanbia


A hlan ah khuapakhat ah Ngun Zal le Thang Zal unau pahnih an rak um. Cu hna cu mi pumrua chuak thiam, midawh, mifim an si i an khua ngaknu lak ah duh tlak an um lo ca-ah an unau in um har lileng in an rak um. An umhar in ramlak ah vate an pel. Cu an kalnak ah cun vancung ngaknu unau pahnih nih an rak hmuh hna i, midawh, mi pumrua ṭha an si caah an rak duh colh hna.

Cucaah anmah sinah rak len awk ah an auh hna i hri an hun thlak hna. Cuticun nifa tin an len lengmang hna. An len hna lai paoh ah, “Lasi le Lasor, kai lainak ah hri te run thla law, te teo,” an hei ti ṭheo tawn. (Vancung ngaknu unau cu Lasi le Lasor an si)

Nikhat cu Vompi nih a theih ve i, amah aw piin, “Lasi le Lasor, kai lainak ah hrite run thla law, te teo,” a ti ve. Ngaknu hna nih kan tlangval aw a si lo, an ti tikah an tlangvaal aw cu a cawn a cawn i a hnu ahcun an tlangval aw te cun a hei ti ṭhan. Cu tik ah ngaknu hna nih cun hri cu an thlak. An hnuh tik ah a rit tuk nain an i hneek chih. An sin a phaak lai lawng ah vompi a si kha an theih i an thin len nain an thing kho ti lo.

Zaan an ih tik ah pakhat nih, “Pu Vom vaa thawn, ka maw ihnak khuahri beo,” a ti i “ruut” tiah tlawmpal aa thawn. Tlawmpaal ah ngaknu nih cun, “Pu Vom vaa thawn, ka maw ihnak khuahri beo,” a ti ṭhan i “ruut” tiah tlawmpal aa thawn ṭhan. Cu tin an ti lengmang i a hnu ah Vompi cu ihkhun cung cun a tla ai. A tlaknak ding ah so an rak bunh ciami nih a chunh. A hrum a ai lio ah tisa tlawk an toih i Vompi cu a thi.

A thaizaan ah Ngun Zal le Thang Zal cu an ra i, “Lasi le Lasor, kai lainak ah hri te hun thla law teteo,” an ti hna. Ngaknu cu an rim cang i Vompi nan si sual lai an ti i an thlak duh ti hna lo. Vompi kan si lo e, nan tlangval kan si ko, an ti len hna cu an duh lo. Hri in kainak a um lo caah ke in kal an i tim. Lam a hlat tuk caah an kal lengmang i a hnu bik ah ngaknu te khua cu an va phan. Ngaknu te cu an rak um lo. Ngakchiapa an va auhter hna. Mi zeidah an si an i dawh maw an ti i an i dawh lo pakhat caw-ek, pakhat vok-ek a lo, a ti hna. “Rak thu ko hna seh, hawi manh lo ah,” an ti. Nan tlangval an si tiah va ti hna an ti i a va kal ṭhan cu caw-ek le vok-ek a lo mi cu kan tlangval an si kho lai lo, rak kal zokzok hna seh va ti hna, tiah an cah. Ngakchiapa cu a va kal i a va chimh tik hna ah an ngaihchiat le an thinhun in an khua lei panh in an tlung ai.

Ngaknu hna cu an rian an hun i lim i an rak ṭin cu an innpawng pitarnu nih, “Nihin nan mileng cu an i dawhning hi chim khawh an si lo, an pum rua ṭhat si, an i dawh si, auh ding ah mi an hun thlah lengmang nain nan rak ṭin duh lo i an ngaihchia in an tin, tiah a chimh hna. Cu cangka cun an tlangval an si kha an hngalh i an dawi ve hna. An dawi lengmang hna i an phan hlei hna lo.

“Arfi ceute langlang, thlanthla mei te soihsoih,” an ti tik ah tlangsang kha an niam dih i Ngun Zal te unau an lupawng te kha a hlatpi in an hei hmuh tawn. An lupawng te an hmuh cun heh tiah an dawi ṭhan hna. Phaak khawh lo in Ngun Zal te cu inn an phan.

Inn an phak tikah Ngun Zal te unau cu so sernak ah an rak kal cang. An innhngaktu sachia lawng a rak um. Vancung ngaknu hna nih Ngun Zal te unau khuazei ah dah an um tiah an hal i sachia nih so an ser a ti hna. Ngaknu pawl nih va kan auh piaktuah hna tiah an fial i sachia nih a va tli zokzok i khual pawl nih an in herh hna, a va ti. Zei bantuk mi dah an si, tiah an rak hal i sachia nih cun pakhat cu sia ek bantuk pakhat cu caw ek bantuk an si tiah a ti hna. Cu bantuk cu kan duh lo, an rak ti. Sachia cu a va tli i cu bantuk cu kan duh lo, an ti, tiah a chimh hna. Va au ṭhan hna an ngaknu kan si an ti, tiah va ti hna, tiah an fial ṭhan. Sachia cu hrokhrawl rumro in pakhat cu ui-ek bantuk, pakhat cu vok-ek bantuk, tiah a chimh ṭhan hna. Cu bantuk cu kan duh lo tiah an rak ti ṭhiamṭhiam. A hnu bik ah vancung ngaknu nih an hni puan kha va hmuhsak hna tiah sachia kha an putter. Sachia nih ngaknu angki le hni dawhdawh kha fung zun in a chunh i tlek cikcek in a va hmuhter hna. Ngun Zal te unau nih hi bantuk hnipuan a tlekmi cu anmah zong an mui a chiatuk lai, an ti, kan duh lo, an ti ṭhan. Sachia cu a tli ṭhan i nan hnipuan vialte an thleh dih tiah a pek hna. Kan duh hna lo an in ti hna tiah, a hrokhrawl bia lawng cu a chimh lengmang hna. Ngaknu hna zong cu zan tiang in auhter i an rak duh lomi cu an kan duh taktak lo a si, tiah an i lungsak ve cang i an khualei ah an kir.

Ngun Zal te unau cu an rianṭuannak in an rak ṭin. Inn an phak tik ah an innpa nu nih, “Ngun Zal le Thang Zal, khual ngeih i kawh lengmang, auh lengmang ah zeicah dah nan rat duh lo,” tiah a ti hna. Zei bantuk minung dah an si tiah an hun hal tik ah minu nih cun, “ngaknu an si i an i dawh tuk hringhran. Nan innchung an um tik ah nan inn vialte a ceu dih,” tiah a ti hna. Cucaah  vancung an ngaknu an si kha an hun theih i, sachia cu an tlaih i innka ah a bingtalet in an thlai. Cu hnu ah a hngawng an tan i a thi.

Cun Ngun Zal le Thang Zal nih cun an dawi ṭhan hna. An hnu zulh in dawi cu kan phan ti hna lai lo, tiah chawhkanhnak lamphawk in an kal kanh hna. An unau Ngun Zal le Thang Zal cu an ratnak ding lampawng ah theipi kung hnih ah an i cang i thei tampi an tlaiter i an hminter. Ngaknu pahnih cu an rak phan i, “Ka u, ka u a cu thei hmin cu dah ngai, hei ei ta mau mau sih law,” tiah a nau nih a ti. A u nih cun, “ka nau, ka nau, thei hmin tak maw na ruah e, Ngun Zal le Thang Zal kha dah kaw,” a ti ve i ei lo in an lan.

An kal ṭhan i banhla kung cung ah a hminmi an hmuh ṭhan. An ti a hal an rawl a ṭam. A nau nih cu banhla te cu ei ta usih, a ti ṭhan i a u nih banhla taktak a si lo Ngun Zal le Thang Zal an si a ti i  an lanhtak ṭhan. Tlawmpal an kal ah fuṭial an hmuh. Ka u kan rawl a tam tuk cang fuṭial khi fep ta usih, a ti ṭhan. A u nih fu taktak an si lo, Ngun Zal le a nau an si, a ti i an lanh tak ṭhaan, Ngaknu hna nih an kan duh lo caah an kan kirter cang, zei an can zong kan tawng hna lai lo, an ti cang.

Rawlṭaam le tihaal tuar in an kal zungzal ko. Sau nawn an kal hnu ah tiva pakhat an phan. Ti a rak lian ngaingai. Minung tan khawh ding a si lo. Tannak ding an kawl i an hmu fawn lo. Ka khat ah thing pahnih hlei ah aa donhmi kha an hmuh. A nau nih ka u hi hlei hi zawh ko usih law, a ti. A u nih ka nau aw hlei taktak ah maw na ruah, Ngun Zal te u nau kha dah kaw, tiah a ti ṭhan. Kalnak ding lam dang an hmuh ti lo ca-ah a hnu bik tuah awk hngalh lo ah hlei cu an zawh. Ti laifang an phaak ah hlei cu a kiak i a u kha a u nih a tlaih, a nau kha a nau nih aa tlaih i ti zong cu a reu ve.

Vancung ngaknu hna nih cun, a si le nan kan duh taktak ahcun kannih tum pang kung ah kan i cang lai, nannih vate ah i cang u law pau chuah lai paoh ah kan paar lai i kan tizu hi rak tlan te u,” tiah an ti hna. Cu tlawmpal ah cun ngaknu pahnih cu tumpang kung dawh ngaingai ah an i cang ve. Cuti cun khuapau lai paoh ah tumpaang cu a par i cu a paar chung a tizu cu va nih a hung tlanh zungzal tawn.

CACC nih LEVEL III A an chuahmi chungin...
Previous Post
Next Post

post written by: