COMPEI MUICHIATE


Aa dawh ngaingai mi ṭhal caan ah thing hnah hna cu an hun ṭil thluahmah i khua a hun rocar. Inn hlun ngai mi, a rawk pah cang i ho hmanh an um ti lo nak inn tang luti hor kuang pawngte ah, thingbur a borh ngai mi a ruang a ṭha ngai mi a um. Cu thingbur tang ah Compei nih lum ngai in buu aa tuah.

Cu a buu chung ah cun a ti pum ruk a tit. Cu a ti lak ah a dang panga cu a raang nain pakhatte cu a dang nakin a ngan deuh. Cu cu a pawl nawnte a si. Compei nih cun cu a pawlmi ti cu zeica dah hawidang he hin aa lawh hnga lo, tiah hngalh a duh ngaingai.

Compei nih cun cu a pawlmi ti cu atu le atu a zoh, ni za le sawm nga a tlin tikah a ti tete cu an hun kah kha a hmuh tik ah a nuam tuk hringhran.

A thaizing ah cun a dang pum nga cu a ti chung cun compei lu tete an hung chuak i leng ah an hun phan dih, aa lawm tuk hringhran. Cu zan cu an buu chungte ah cun an riak hna. A thaizing ni a chuah ah cun compei fa tete cu an pangate in a leng ah an chuak.

Compei nih cun a ti lak i a ngan cem mi, a pawlmi cu a hngah peng ko. Ni khat hnu ni khat a liam, cu a ti pawlmi cu zeitin hmanh a um lo caah compei cu a lung a sau ti lo. Zing khat cu a hun i ṭhangh ah a tang in a cawlmi thawng a theih i a zoh tik ah a ti a pawlmi cu a kak i a compei fate a mui chia ngaingai mi kha a hmuh.

Compeipi nih cun a mui a chia tuk mi compeite cu, “Nang cu a dang nakin na ngan lai i a dang nakin na ṭhawng te lai, ti chung zong ah ti lio cawnter na hau lai lo,” tiah thazaang a pek.

A thaizing ah cun nikhua a ṭha ngaingai, an umnak thingbur pawng ah tidil a ummi ah an pi nih cun a fale cu a hruai hna. Ti chung ah cun pakhat hnu pakhat in an zuang, ti nih cun an hngawng tiang a phum hna nain an hun cawl i an ke an zah tikah cung ah an hun i lio kho. Compei muichiate cu anmah sin ah cun a rak ra ve i ti cu aa lio ve.

Compei muichiate cu zan khat cu compei an i hngilh dih karlak ah a thlite in an innka a hun i leng ah a chuak. An umnak pawng hrawnghrang ah cun a vak lengmang i ram hring cung ah a kal, pangpar tete a hmuh hna i aa nuam tuk. Cu hnu ah ke pali a ngeimi a ngan ngai mi kha a hmuh tikah a hun zoh i uico a si kha a hngalh.

Uico nih cun a ka a an i a mei saupi kha a hngerh i compei muichiate cu a zohchih. A ṭih tuk caah a zamtak nain uico nih cun a chawhkanh. Compei fate nih cun, “Nangmah ei ding ah cun, kei cu ka mui a chia tuk ee,” a ti. Uico nih, “A ṭha, a si ahcun kaan zaangfah,” a ti i a hnulei aa mer i lam hlapi ah a kaltak.

Caan sau nawnpi a kal hnu ah zei thawngpang hmanh a thei ti lo, a kal lengmang i thlam hmete pakhat a va
 hmuh. Thlam chung ah cun a va lut i ṭhutdan tang ah a bok. Aho hmanh nih an 
hmu lo i a rim zong an thei lo.

Cu zan cu daite in le mitkuh thawte in a riak. Thlam
chung ah cun tarnu pakhat, chizawhte le
arpi he an rak um. A thaizing zingka khua a hun ceu tikah an sin ah a rak riakmi an
 khual cu an hun hmuh.

A pawngte ah an ahun dir, compei muichiate nih cun pakhatkhat an ka ti sual ah cun tiah lenglei ah chuahnak innka ṭhate in aa zoh cia. Asinain zei hmanh an ti lo caah a hna a ngam ṭhan. “Nang na ti na ti kho maw?” tiah arpi nih a hal.

Compei muichiate nih cun lau ngai in, “Ka ti kho lo, zeitin tit a si zong ka hngal lo,” tiah a leh. Cun arpi cu aa mer i a kal, chizawhte a rak ra i, “Na thin a hun tikah a hlapi tiang na per kho maw? Asiloah naa lawmh tikah na ngio kho maw?” a ti.

Compei muichiate nih cun, “Zei hmanh ka thiam lo nain ti cu kaa lio thiam, cu cu mi tampi nih an thiam lo mi a si men lai,” a ti. Cu ka inn te ahcun zarh thum tluk a um.

Arpi le chizawh nih an ei ding kha an cheuh ve, asinain ni a hun chuah i thliherte a hun hran tikah compeite cu ti lio a duh caah cu thlamte cun a chuak ṭhan. A hmuhmi hna saram a hawile tete nih amah cu a hna an ngamter kho lo.

Cun compei muichiate cu ti a umnak hmun ah a kal i amahte lawng a um. Caan tlawmpal chung cu aa nuam ngai ko nain khuasik a hun chuak i dap le horha an tla, a pawngkam cu a daam dih, umnak a nuam ti lo. Zing khat hnu zing khat in a kik chinchin. A khua a lum bal lo.

A hnu ah cun zan ah a kih tuk caah a ke cu ti nih a khal hnawh i a cawi kho ti lo. Vanṭhat ah mipa aa chokvaimi nih a hmuh i a zaang a fak tuk caah a laak i an inn ah a ṭinpi. Compei muichiate cu ngakchia sin um a duh lo i a kal ṭhan.

Khuasik cu a kik tuk i har ngai ko hmanh seh law duhsahte in a liam, ṭhal a hun chuak ṭhan. A hun dir i a pum cu phundangpi in a um. Ni khat hnu ni khat a ngan i a zuan zong a zuang kho.

Cung ah a zuang, cun a rung ṭum ṭhan i a pum cu aa zoh. Cun a pawng ah duhsahte in a kalmi va a buupi in a ummi a hmuh hna. A lau nawn, a naih deuh hna i ṭhate in a zoh hna i tibual cung ah daite in an um ko kha a hei hmuh hna.

“Hi hna hi ka zulh hna lai, zeitluk kaa dawh lo zong ah, rawl lo in thih ding le khuasik in thih ding nakcun,” a ti. “Hi hna nih cun harnak an ka pe lai lo,” a ti, a zuang i an umnak ah cun a ṭum, an hnulei cun a dawi hna.

Ti a rak i liomi compei nih an rak hmuh tikah acheu nih an hun don, compei
muichiate cu a khuaruah a har tuk. Aa mer i vapi pakhat kha a hei chimhmi cu, “Nangmah nih kan thah lai na ti
ahcun, ka thi ko lai. Zeica dah hi tlukkhin muichia in ka um?” tiah a ti. Cun a lu a khun i ti chung ah aa zoh.

Tichung ah cun cu ka pawng i a tlongmi a hngawng a rang i a mei a saumi a
hmuh hna. A pum cu aa zoh ṭhan, a
 pawlmi amah bantuk pakhat hmanh a
hmu hna lo. Cun, “A poi lo, keimah bantuk hngawng le hmur aa dawhmi an um lo,” a ti. Cu lio ah ngakchia pawl an ra i rawl an hun pek hna.


Ngakchia nih cun, “Khi ka a tharte khi aa dawh bik, a hmul hi a rang tuk
lo nain a hmurte khi a sen bik, a dang lak ah,” an ti. Compei muichiate nih cun a theih tikah, “Mah cu rak theih lo in maw ka mui a chia tuk ka ti len, keimahte lawng umharte in le harsatnak phunphun ka tuar, atu cu ka tei cang a ti, cu tluk lunglawmh awk a simi cu maw ka rak hngalh bal lo,” a ti.

Ref: CACC Lehmi